أبرز ما جاء في الرسالة:

واحد حكالي انا مستعد افرجيك انه هو شاذ جنسيا فبالأخير وافقت وراقبنا صديقي وشفت كيف دخل على حانة للشواذ

انا كتير متضايق من نفسي ومن الشي اللي عرفته من ناحية انا مش حابب اخسره لانه احس انه هو تقريبا اكثر صديق صادق وما في مرة احتجته الا وكان جنبي ومن ناحية بشفق كمان عليه عشان اهله مش مناح كتير وعيتله مفككة

وصلت الى موقع العرب رسالة من شاب يطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

مرحبا لجميع زوار موقع العرب و بشكركم مسبقا لاعطائي النصيحة انا حابب احكيلكم مشكلتي و بتمنى منكم تساعدوني في حلها انا شب عمري 24 سنة و بدرس بالجامعة هون بالبلاد مشكلتي هي، من فترة في واحد معنا بالجامعة حكالي انو هادا صاحبي شاذ جنسيا، طبعا أنا انصدمت من الموضوع و ما صدقت زميلي في الدراسة و السكن اللي هو الان أعز صديق عندي قلته أبدا لانه هو الشخص اللي خبرني مش مستقيم بحياته و بحس انه بيغار كتير كوني يعني انا و صديقي متفاهمين كتير بالدراسة و بالسكن بس ظل يزن عليي و حكالي انا مستعد افرجيك انه هو شاذ جنسيا فبالأخير وافقت و راقبنا صديقي و شفت كيف دخل على حانة للشواذ.

و من وقتها انا مصدوم كتير بالشي اللي عرفته و شفته، المشكلة انا تعرفت عليه من اول ما بلشنا بالجامعة لانه هو من منطقة أخرى غير منطقتنا و من أول ما بلشنا دراسة بالجامعة سكنا مع بعض و انا ما شفت منه الا كل الخير حتى مرات كنت أتضايق ماديا فكان هو يعني يدفع أجرة السكن و لما بيصيري معي بعطيه و ما كان يحكي شي أبدا و بعمره يعني ما حاول معي يعني يعمل شي من شغلات الشواذ بالعكس انا دائما ما كنت أحب أكون مثله فهو شاطر جدا في الجامعة و يعمل أيضا بجد و في أوقات فراغه يستغلها في مشاريع تطوعية في مراكز العجزة أو الأطفال الصغار و كل من يعرفه يحبه فهو بسيط جدا و مهذب جدا حتى والدتي و اخواتي قالوا لي بأنه مختلف عن كل أصدقائي فهو قد زارني كذا مرة في منزلنا و نام عندنا و اهلي يقولون لي حماه الله لأهله فهو لا يرفع نظره أبدا عندما تحادثه أمي أو احدى النساء في عائلتي.

مضايقة نفسية
هو حس بشيء ما و بالفترة الأخيرة بلش يسألني ليش أنا بتعامل معه ببرودة و سألني اذا انا متضايق منه و قلي اذا انا غلطت معك بشي أرجوك سامحني بيكون بشرفي من دون قصدي و انا بعتذر. انا كتير متضايق من نفسي و من الشي اللي عرفته من ناحية انا مش حابب اخسره لانه احس انه هو تقريبا اكثر صديق صادق و ما في مرة احتجته الا و كان جنبي و من ناحية بشفق كمان عليه عشان اهله مش مناح كتير و عيتله مفككة بس كمان الشخص اللي قلي عنه انه شاذ بيقولي اترك السكن معه و ابعد عنه لانه بكرا الناس بتقول انك مثله و انا ما بدي اجيب مشاكل لحالي فشو رأيكم أبعد عنه و أترك السكن معه شكرا.

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي:alarab@alarab.net