عد للعشرة عد للعشرة...
يا عالم.. شوية احساس
عامل حالك الشاب الشاطر
وحامل سكينة للناس..!
واذا اتطلع حد بعينك..
طوالي ترميه برصاص!
منك نظرة ..منه كلمة ...
وهاي جدال على كاس
عد للعشرة عد للعشرة..
مش رخيصة ارواح الناس
مالك دايما دمك حامي ..
وراسك مليان بالوسواس
بسمع منك ..اسمع مني..
بلاش ترضي .. هالخناس
عامل حالك فتوة عصرك
بتضرب أخماس واسداس
وانت قاعد جوه قصرك ..
بتبعث بتهديدك.. عباس..!
بدك خاوة.. بدك مال ..
بدك تجبي أموال الناس
وقف عندك الزم حدك ..
ما بنرضى برجلك ننداس
انت غريب..منك منا ..
ارحل عن بلدي يا قاس
مش كل واحد قلك كلمة
طوالي بترميه بفاس..!
يا بترحل من بلدي أحسن
يا بتصير.. زي الناس..
احنا كرهنا لون الدم ..
وكرهنا صوت الرصاص
لازم تعرف انو احنا ..
زهقنا..تعبنا ..ملينا خلاص
على موقف سيارة بنتقاتل ..
عىى حد ..وسور.. وقياس
واحنا قرايب واحنا جيران
لكن عرق الجهل كنه دساس!
من أول كلمه بنحكيها ..
نلاقي الفاس وقع في الراس!
عد للعشرة عد للعشرة...
يا عالم شوية احساس..!!!!
 

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net