هذه القصيدة الزجلية من الوالد عزمي حبيب الله "ابو الشادي "عين ماهل
مهداة الى الابنة الغالية الصيدلانية الحان حبيب الله
بمناسبة التخرج من كلية الصيدلة في جامعة العوم والتكنولوجيا في الاردن..الف مبروك...

إلى لحّونْ بمناسبة التخرج
ناديتْ عالَحّونْ قُلْتِلْها تَعي مِنْ بَحَر شِعْري أُغُرْفي وِاتْسَمَّعي
وانْزلي عالْقَلْبْ تِلاقي مَسْكَنِكْ اتْعَرْبشي عَرْموشْ عَيْني وِاطْلَعي
نامي تَحِتْ جفني هْناكَ مَطْرَحِكْ خُذي بَصْبوصْ عَيْني حتّى تِقْشَعي
* * * * * * * *
شوفي حنينِ الرّوحْ وَحْدُه يِعْرَفِكْ كُلْ ما فْتحْتِ الْعين سايِلْ مَدْمَعي
هذه دْموعِ الفرحْ صارِتْ مَسْبَحِكْ خذي بْحورِ الزَّجَلْ فَجِّريها وِافْقَعي
جَنّْ شِعري وبِالْقصايِدْ مُعْتَرَكْ تصارِتْ يا لَحّون اشعاري.. مَدْفعي
عا لَحِنْ إِسْمِكْ رَدّدي عا مَسْمَعِكْ خَلّي الْبلابِلْ تِنْشِدْ بِشِعْرِ الأصْمَعي
* * * * * * * *
واليومْ في نجاحِكْ نِلتي مَطلبكْ بعد التَّعب والسّهرْ راسِكْ ارْفعي
حتى بْحورِ العِلِمْ صارِتْ مَنْهلِكْ تنهلي منها الْمعْرِفِه وِتْجِدّي السَّعي
نلتِ الرِّضا وِالْحنينْ .. بْمَنْزِلِكْ مِنْ َبِعدْ ألله الرّضا.. كُلُّه منْفعِ
إحْمِدي ألله يا بنتي حتى وَفَّقِكْ وابْقي لَ إلــه الْكونْ دومْ بْتِخْشعي
دعيتِ أمامِ الرّبّْ لبَّى مَطْلبِكْ بِالصّلاه لِغيرِ الله ما كنتِ تِركعي
مِثِلْ ما وصَّى النّبي نُورِ مْحَبِّتِكْ قلبي بِحبِّ النبي دايِمْ مولَعِ
هدانا للعِلْم وِالْخُلْقْ نَوَّرّْ مَسْلَكِكْ كتاب الله وسنّة نبينا اعظمْ مَرْجِعِ
* * * * * * * *
مِنْ ثَمْرِةْ نَجاحِكْ عَبّي سلِّتِكْ يَلْ مِنِ تْرابِ الْوَطَنْ كُنْتِ تِرْضَعي
وِاليومْ حانِ الْقَطِفْ إِجْني ثَمِرْتِكْ منْ خَيْراتْ هالأرْضْ يا بنْتي اجْمَعي
مْكَلّلي بالنّجاح وبالقلْبِ مْعَزِّتِكْ عندِ الصِّعابْ ماتْليني وْمَكُنْتِ تِخْضعي
كُــلِّــكْ إِرادِه وِالطّموحِ بْمَحْفَلِكْ يْلينِ الصّخِرْ تَحْتِ ادَيْكِ ويِخْلَعِ

اتْبَسّمي يا حنونِهْ مَحْلى مَبْسَمِكْ وَخَلّي الصّبايا الْ مِنْ حَوْلِكْ مِتْجَمّعي
مِثْلِ البَدِرْ وسْطِ الدُّجى بَهِيّه طَلِّتِكْ فوقِ السّما تِسْبَحْ وِالنّجوم بْتِلْمَعِ
بْأرْضِ الْهاشِمي كانِتْ جميلِه غُرْبِتِكْ مْعَزّزِه مْكَرّمِه في ديرْتِكْ ِ تِتْمَتّعي
الاردن الك يابنتي ثاني موطنك عشت من العمر بيناتهم حب ووعي
إربدْ عَروسِ الشمالْ أولى مْحَطِّتِكْ ابْتَدى مِشوارِ العِلمْ بِأوّلْ مَطْلَعِ
* * * * * * * *
عنْ أصْلِكْ وعنِّكْ كُلْ مينِ بْيِسْألِكْ ؟ قولي: من عين ماهل جذوري ومَنْبَعي
يِدومْ عِزِّكْ دوم... مَرْفوعَه رايِتِكْ خَفّاقه وعَقِمّةْ جبلْ سيخ الْمَوْقَعِ
بِرْعايْةِ الرّحْمنْ وربّي يِسْتُرِكْ إمْشي طريقِ الْخيْرْ عُمْرِكْ ما بْتوقَعي
عُقْبالْ خَيِّكْ "شادي" بَعْدِ تْخَرُّجِكْ بْشَهِرْ يوني رَحْ تِكْمَلِ الْفَرْحَه معي
بِْإذْنِ الله بَعِدْ مِنِّكْ... يِتْخَرّجْ طَبيبْ
يْداوي قْلوبِ مْعَلّلي وْناسْ مْوَجَّعي
* * * * * * *
مع محبتنا لك ...
باسم العائلة: والدك عزمي حبيب الله "ابو الشادي"

موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع على العنوان:alarab@alarab.co.il