وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية

الرسالة هي الكالتالي:

تحية طيبة وعطرة لموقع العرب ولكل العاملين فيو انا حابه افضفض شوي بلكي بلاقي حل لمشكلتي عشان انا اتعبت كتير ومش قادرة اتحمل اكتر من بعد يلي صار ولا حتى اني قادرة اكمل حياتي من بعدو حياتي صارت ظلام بظلام ومالي قدرانه ابدا صفحه جديدة ولا حتى اني انسى مع انو الكل بقول انو الزمن بنسى الجروح بس انا مالي قدرانه انسى هي مرقوا سنتين عوفاتو ومالي قدرانه انسى .

صورة توضيحية

انا صبيه عمري ٢٧سنه من منطقة المثلث خلصت دراستي الجامعيه وقصتي بلشت قبل سنتين لما اتعرفت عشب بالجامعه من الشمال كان يدرس معي شب جدي ومحترم واد حالو حبينا بعض حب صادق وشريف واتقدم لخطبتي من اهلي والحمد الله خطبنا وعشت معو احلى ايام حياتي كان لالي كل شي الاخ والصديق والحضن الدافي كان دايما يوقف حدي ويشجعني ولما اضايق احكيلو وافضفضلو وكان صريح معي بكل وصادق وعشان هيك يوم بعد يوم كنت احبوا اكتر واتعلق فيو اكتر واحمد الله انو خطبت لشب متلو حتى انو شجعني اني اكمل دراستي للقب التاني وكان واقف حدي بهي الخطوة بالرغم من خوفي كان دايما معي بكل خطوة عم اخطيها لحد ماجا هذاك اليوم يلي قلب فيو حياتي قلب وغير كل شي حلو فيها يوميها اتصلوا اهلو فينا وحكولي انو خطيبي عمل حادث سيارة ووضعوا خطر وهو هلا بالمشفى ولما روحت عالمشفى ما قدرت اتحمل الصدمه وضعوا كان خطير وضلينا حدو لمدة ٣ ايام وهو كان بغيبوبة وبعدا اتوفى قدام عيوني ومن كتر الصدمه ما اتحملت وفاتو يوميها واغمى عليه ومن بعدا مريت بحالة نفسيه صعبه حبست حالي باوضتي وما صرت اطلع منها ولا اكل ولا اشرب ولا حتى اني احكي مع اي حدا تاني وظليت عهاذ الوضع لمدة اشهر لحتى وصلت المستشفى بوضع صعب كتير فالدكتور حكى لاهلي هاذ وضع نفسي بسبب صدمه فاهلي حكولوا هيك هيك صار فامي صارت تحكيلي انو اتحمل واصبر ووقفت حدي هيه وابوي واخوتي بس ما قدرت انسى خطيبي وصورتوا ما عم بتروح من بالي حاسه انو حياتي من بعدو مالها اي معنى ولا لون ومالي لزوم اني اظل عايشه حاولت انتحر من بعدوا بس ما قدرت وظليت بعلاقة مع اهلو واطمن عليهن كل فترة وفترة بعد وفاة خطيبي اتقدملي عرسان بس انا رفضت ارتبط باي حدا تاني من بعدو وحكيت لاهلي من بعدو ما رايحه ارتبط باي حدا لو مين ما كان لحد ماجا هذاك اليوم واخو خطيبي المتوفي اتصل عابوية واحكى معاه بموضوع فاجا ابوية عليه وبحكيلي انو اخو خطيبك بدو بطلب ايدك مني فشو قلتي فانا زعلت كتير واتعصبنت وقلت لابوية اني ما رايحه اخطب غير خطيبي يلي اتوفى حاسه اني اذا خطبت غيروا وارتبطت بشب غيروا اني عم اخون الحب يلي كان بينا الحب يلي كان بقلبي لالو ويلي عشنا معاه احلى ايام عشان هيك انا رافضة اني ارتبط باي حدا تاني ومالي قدرانه انسى صورتوا ولا ضحكتوا ولا حنانو ولا حكيوا ولحد اسا ما عم بقدر فيا ريت تحكولي شو اعمل انا بحاجه للمساعده عشان انا كتير تعبانه وشكر الكو .

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il